Opplæring og rettleiing for pårørande
Føremålet med opplæring og rettleiing er å setje deg i stand til å ta vare på den du gir omsorg til på ein god måte, og samtidig hjelpe deg til å ta vare på eiga helse og livssituasjon.
Kven kan få opplæring og rettleiing?
Har du særleg tyngjande omsorg for ein nær person? Då kan du ha rett på rettleiing og opplæring som kan støtte deg i kvardagen.
Når kommunen vurderer kva som er særleg tyngjande omsorgsarbeid, ser vi på:
- omfanget (timar per månad)
- den fysiske og psykiske belastninga arbeidet inneber
- om arbeidet skjer regelmessig eller i periodar
- varigheita på omsorgsarbeidet
- om du har omsorgsplikt
- om du har økonomisk tap som følgje av omsorgsarbeidet
Kva kan du få støtte til?
Du kan få støtte til:
- å lage gode rutinar og gjere kvardagen meir føreseieleg
- praktiske råd for å handtere vanskelege situasjonar
- praktiske råd knytt til konkrete oppgåver du gjer heime
- å forstå sjukdom eller funksjonsnedsetjing hos den du tek vare på – til dømes ved demens eller diabetes
- å handtere sorg, stress og forventningar
- å kome i kontakt med andre kommunale tenester eller spesialisthelsetenesta
Opplæringa kan skje gjennom samtalar eller som rettleiing i heimen – alt etter kva som passar best for deg og familien din. Vi legg vekt på kva du treng!
Kor mykje rettleiing og opplæring du får, blir vurdert ut frå din situasjon.
Slik søkjer du
For å søkje om opplæring og rettleiing, må du sende inn søknadsskjema. I søknaden kan du spesifisere kva tiltak du søkjer på. Du bør opplyse om:
- kva utfordringar den du gir omsorg til har
- kva omsorgsoppgåver du utfører og omfanget av desse
- korleis omsorgsarbeidet verkar belastande for deg
- om den du gir omsorg til får hjelpestønad frå NAV
Du kan ta kontakt med kommunen dersom du treng hjelp til å søkje. For personar over 18 år må du ha skriftleg samtykke frå den du gir omsorg til for å kunne sende inn søknad.
Søk om opplæring og rettleiing:
Søknad om helse- og omsorgstenester (pdf)
Søknaden skal sendast til:
Ål kommune v/Helse og omsorg
Omsorgskontoret
Torget 1
3570 Ål
Pris for teneste
Opplæring og rettleiing er gratis.
Søknadsfrist
Det er ingen søknadsfrist – søknader blir behandla fortløpande.
Kva skjer vidare?
Når vi har motteke søknaden din, vil kommunen vurdere behovet og fatte eit vedtak. Vi avgjer om opplæring og rettleiing skal tildelast, eller om behovet skal løysast på annan måte.
Sakshandsamingstid
Kommunen skal behandle saka di så raskt som mogleg. Dersom det tek meir enn éin månad, vil du få skriftleg beskjed om kvifor, og når du kan vente vedtak.
Klage
Dersom du er misnøgd med vedtaket, kan du klage til kommunen. Du må klage innan fire veker frå du fekk vedtaket. Forklar kva du er misnøgd med, og kvifor du meiner vedtaket bør endrast.
Du sender klagen til kommunen. Kommunen går gjennom saka på nytt. Dersom kommunen ikkje endrar vedtaket, blir saka sendt vidare til Statsforvaltaren, som avgjer klagen.
Treng du hjelp til å klage, kan du kontakte kommunen.
Lovheimel
Helse- og omsorgstenesteloven § 3-6
Informasjon frå Vestre Viken
Sjukdom påverkar ofte heile familien og vennskap. Å vere der for nokon som er sjuke kan gi samhald i familien og personleg vekst, men dei aller fleste møter også mange utfordringar. På denne sida har Vestre Viken samla nyttige ressursar, råd og rettleiing som kan vere til hjelp i kvardagen.
Her finn du informasjon for deg som er pårørande