Skulesatsing og kultur

Torpo Skule

2010 begynte med langvarig kulde og gav ein treg start på det største byggeprosjektet for tida, nemleg restaurering og fornying av Torpo Skule.
Det skal byggast for 31 mill kr. og  skulen får god plass til om lag 100 elevar.
I mange år har det vore klart at både ventilasjonsanlegg, vindauge og mykje anna ved skulen måtte fornyast. Når dette er ferdig, får Torpo eit moderne og framtidsretta skulebygg med gode arbeidstilhøve både for elevar og lærarar. I byggetida må alle finne seg i ”unntakstilstand” ved at elevane mellom anna må skyssast til Lien for undervisning.
Planen er ferdigstilling i august til skuleåret 2010/11.

Skulen i Ål
Ein god skule er definitivt mykje meir enn gode skulebygg. God og kvalifisert leiing og dyktige lærarar er kanskje enno viktigare for eit godt læringsresultat.
Foreldra har også eit viktig medansvar for at borna skal få godt utbytte av skulegangen. Lærarar og andre tilsette kan aldri erstatte den rolla foreldre har som støttespelarar og  oppdragarar for eigne born.
Over heile landet er lokalpolitikarane sitt medansvar for skulen sett meir i fokus. Lokalpolitikarane skal ha eit medvete forhold til måla som er sette for skulen.
Det er kommunestyret som er skuleeigar og som sit med det formelle ansvaret for arbeidet som blir gjort i skulane i Ål.
Det er naturleg at dette blir tema i det politiske arbeidet i Ål kommune i 2010.

Kulturplanen for Ål
Formannskapet sette i haust ned ei arbeidsgruppe som skal lage utkastet til ein kulturplan for Ål. Planen skal fortelje korleis me skal prioritere kulturarbeidet dei komande åra. Både friviljuge organisasjonar og det profesjonelle kulturlivet vil bli omtala.

Planen blir lagt ut på høyring i mai. Då ynskjer me at flest mogleg bidreg med sine meiningar og innspel. Planen blir til slutt handsamast av kommunestyret i junimøtet.

Torleif Dalseide
   ordførar