Konsesjonslova fastset at all overtaking av fast eigedom (herunder m. a. overtaking ved arv, gåve og kjøp), samt stifting av bruksrett for meir enn 10 år, er konsesjonspliktig med mindre det er gjort unntak i lova eller i forskrifter fastsette i samsvar med lova. Som overtaking reknar ein også overtaking av delar eller partar i ein eigedom. Ei konsesjonspliktig overtaking kan ikkje tinglysast med mindre konsesjon er gitt.

Lova har til formål å regulere og kontrollere omsetjinga av fast eigedom for å oppnå eit effektivt vern om produksjonsareala i landbruket og slike eigar- og bruksforhold som er best  for samfunnet, m. a. for å tilgodesjå: 

• behova til framtidige generasjonar
• landbruksnæringa 
• behovet for  utbyggingsgrunn 
• omsynet til miljøet, allmenne naturverninteresser og friluftsinteresser 
• omsynet til busetnaden

Mange unntak - få eigedomar krev konsesjon:

• Unntaka frå konsesjonsplikta er omfattande, og det er berre for ein liten del av eigedomane som er overtekne, at  det må søkjast om konsesjon. 
• Eit vanleg tilfelle der ein må søkje konsesjon, er ved overtaking av utbygd eigedom som har eit totalareal større enn 100 dekar, eller har meir enn 20 dekar fulldyrka jord (1 dekar er 1 mål er 1.000 m2). Arealgrensa vart heva til dette nivået 1. januar 2004.
• I Ål er slektskapsunnataket oppheva slik at ny eigar i dei tilfelle der bustadhus ikkje lenger skal vera i bruk som bustad, må søkje konsesjon, sjølv om vedkomande er barn, barnebarn eller nevø/niese til tidlegare eigar.